“விடுமுறைகளில் கல்வி இழப்பை குறைக்கும் ஆவூர் ஊர் புற நூலகம் புதுக்கோட்டை மாவட்டம்”
அனைவருக்கும் வணக்கம்.
2026–2027 ஆம் ஆண்டில் நடைபெற உள்ள திறனறிவுத் தேர்வுகளுக்கான முன்னேற்பாடுகளை வலுப்படுத்தும் வகையில், ஆவூர் அரசு மேல்நிலைப்பள்ளி பட்டதாரி ஆசிரியர் திருமதி க. கயல்விழி அவர்கள் ரூ.2,000/- மதிப்புள்ள இருபுற அலுமினியம் பார்ட்டிக்கிள் போர்டு (Double-Sided Aluminum Particle Board) ஒன்றை ஆவூர் ஊர்புற நூலகத்திற்கு வழங்கியுள்ளார்.
ஆவூர் ஊர்புற நூலகம், பள்ளி நேரத்திற்கு பிந்தைய காலங்களில், வார இறுதி நாட்கள் மற்றும் விடுமுறைகளில் கிராமப்புற மாணவர்களுக்கான “ கற்றல் மையம் (Learning Hub) ” ஆக செயல்பட்டு வருகிறது. இதன் முக்கிய நோக்கம், விடுமுறை காலங்களில் ஏற்படும் கல்வி இழப்பை குறைத்து, மாணவர்களின் தொடர்ச்சியான கற்றலை உறுதி செய்வதாகும்.
காஞ்சீபுரம் மாவட்ட ஆசிரியர் கல்வி மற்றும் பயிற்சி நிறுவனம் (DIET) முன்னாள் முதல்வர் திரு. எஸ். சிவகுமார் அவர்கள், “விடுமுறை காலங்களில் திட்டமிட்ட கல்விசார் ஈடுபாடு மாணவர்களின் கற்றல் இடைவெளியை குறைக்கும்” என்று வலியுறுத்தியுள்ளார். அவர்களின் இந்த வழிகாட்டும் கருத்தின் பேரில், கிராமப்புற நூலக கற்றல் மையம் மேலும் வலுப்படுத்தப்பட்டுள்ளது.
திருமதி க. கயல்விழி அவர்கள் வள ஆதரவு வழங்குவதுடன் மட்டுமின்றி, பள்ளி விடுமுறை நாட்களிலும் கல்வி வழிகாட்டுதலை வழங்கி, மாணவர்களை திறனறிவுத் தேர்வுகளுக்குத் தயார்படுத்தி வருகிறார். பெற்றோர்களும் உறுதுணையாக இருந்து, குழந்தைகள் தொடர்ந்து கற்றலில் ஈடுபட ஊக்குவித்து வருகின்றனர்.
ஊர்புற நூலகர் திருமதி B. நாகலட்சுமி அவர்கள், கற்றல் மைய செயல்பாடுகளை சிறப்பாக ஒருங்கிணைத்து, ஒழுங்கான மற்றும் ஊக்கமளிக்கும் கற்றல் சூழலை உருவாக்குவதில் முக்கிய பங்கு வகித்து வருகிறார்.
பொருளாதார ரீதியாக பின்தங்கியிருந்தாலும், கல்வியில் உயர்ந்த இலக்குகளை கொண்ட இம்மாணவர்களுக்கு, கிராமப்புற நூலக கற்றல் மையம் கல்வி சமத்துவம் மற்றும் முன்னேற்றத்திற்கான ஒரு வலுவான படியாக திகழ்கிறது.
இவ்வளவு மதிப்புள்ள கல்வி ஆதரவை வழங்கிய திருமதி க. கயல்விழி அவர்களுக்கு ஆவூர் ஊர்புற நூலகர் மற்றும் வாசகர் வட்டம் சார்பாக மனமார்ந்த நன்றியை தெரிவித்துக் கொள்கிறோம்.
